Bahrom Mahmudzoda

O'ylaganmisiz

Bahrom Mahmudzoda - O'ylaganmisiz
Oyning orzusini osmon bilgaydir,
Quyosh ko'zgusini Tangri tutgaydir,
Ayting, dilingizdan nelar o'tgaydir,
Siz ham men haqimda o'ylaganmisiz?

Har on, har soatda sizni o'ylayman,
Azobda, rohatda sizni o'ylayman,
Hatto ibodatda sizni o'ylayman,
Siz ham men haqimda o'ylaganmisiz?

Jonimni chertsalar jarangida siz,
Yakkasiz Turon, Rum, Farangida siz,
Malikam siz muhabbat rangidasiz,
Siz ham men haqimda o'ylaganmisiz?

Demishlar, har gulning gulobi shirin,
Quyoshga ko'kdagi mohtobi shirin,
Mahmudga vaslingiz sharobi shirin,
Siz ham men haqimda o'ylaganmisiz?