Bahrom Mahmudzoda

Alloh bor

Bahrom Mahmudzoda - Alloh bor
Alloh bor, Alloh
Ko'ringan giyohdan ifor izlama,
Shabnamga termulib g'ubor izlama,
Nokaslar nonidan mador izlama,
O'ziga yukunib yig'lasang goh-goh,
Nasibang berguvchi Alloh bor, Alloh!

Tiriksan, tugamas sira armoning,
Mehnating tuzingdan topgan darmoning,
Gullab ketmasa bas tilda yolg'oning,
O'zingdan o'zingni etolsang ogoh,
Seni qo'llaguvchi Alloh bor, Alloh!

Odamzod azaldan tomoshaga o'ch,
Yo'lbars yo'llaringda har kun kelmas duch,
Himoyaga topsang vujudingda ko'ch,
O'zing o'zgalarga qazimasang chog',
Seni asraguvchi Alloh bor, Alloh!

Kunduz qo'yosh, oqshomda oy arzanda,
Yo'lga yarashasan yursang Vatanda,
Nogoh chaqib qolsa bitta gazanda,
Dod solma, umring bor boshingda panoh,
Yaratganning o'zi Alloh bor, Alloh!

Kelibsan, ey Mahmud, ketishdan qo'rqma,
Boboning o'tgan yo'ldan o'tishdan qo'rqma,
Mangu makoningga yetishdan qo'rqma,
Dildan chiqsa La ilaha illalloh,
Bandamsan deguvchi Alloh bor, Alloh!